ماتقولش مصر هي امي

هييييييييييييه انا اتخرجت
انا اتخرجت يا بابا انا اتخرجت يا ماما

جربت في كل ناحية في البيت وانا مش مصدق نفسي معقولة خلاص مش حذاكر ولا حاجة بعد كدة ؟؟
مش حفتح ولا كتاب ولا امسك ولا قلم

سبت ماما تحضني وتقبلني في كل حتة فيا ودموعها تمسح وجهي
والله وكبرت يا بني وخلاص اهو اتخرجت عقبال ما نخطبلك بقى وتبقى صاحب بيت وعيال

تراءت امامي صورة راجل بكرش كبير كدة اعد على الكنبة عمال ياكل في اللب من غير ما يقشره
اصله مش فاضي ,, وصوته يخترق آذان السامعين وهو ينادي الشاي فين يا عزيزة

وهززت رأسي بقوة انفض تلك الفكرة السخيفة من خاطري وقلت بسرعة متداركا موقفي
بيت ايه وصاحب مين ياما بس خليني بس اشوف حكاية الجيش علشان اشتغل كدة وربنا يسهلها في وشي

وسمعت صوت ابي الذي قرر ان يشاركنا الحوار يقول : انا غلطان اني مجبتلكش اخ صغير علشان تدخل الجيش كدة وتطلعلنا راجل

- ايه يا بابا انت شايفني ادامك بجيبة ولا ايه
- انت فاكر نفسك ياض راجل بجد ؟؟ دنت الدنيا لسة مورتكش الوش التاني بتاعها بكرة تتفرم وتعرف يعني ايه دنيا

- ماما ابعدي الراجل جوزك ده عني دلوقتي انا مبسوط ومش عايز حد يعكنني

- ايه يا ابو صلاح مالك والواد ده ما بدل ما تباركله على نجاحه ,, معلش يا بني هوه باباك كدة دايما يكسر مقاديف الواحد

- اعدي انتي دلعي فيهم دلعي فيهم لحد لما تجيبيهم لورا

^^^^^^^^^^^^^^^^^^^^^^^^^^^^^^^^^^^^^^^^^^^^

المشهد الثاني :

سنة !!!!
سنة عدت عليك وانت متخرج يابو صلاح ..

وبعدين ؟؟؟
انا بقيت عامل زي العمود الواقف لا شغلة ولا مشغلة
ده حتى العمود بيسند البيت
انا بعمل ايه في حياتي ؟؟

تراءى شبح المستقبل ادامي
انا لا قادر الاقي شغل ولا قادر اتقدم لخطبة منى ولا قادر اعد كدة

يارب طيب ادور فين تاني دنا مسبتش شركة غير قدمت فيها ومسبتش اعلان في جرنان الا وعلمت عليه ورحتله ..
كل حاجة يقولك خبرة سنتين خبرة سنتين انا مش فاهم احنا نجيب خبرة سنتين من الشارع يعني ونجيلهم
اذا كانت كل شركة عايزة خبرة سنتين كدة مش حشتغل في حياتي ابدا..

الا لو يقبلوا بخبرة سنتين في الاعمال المنزلية

بدأت احلامي تتلاشي
شركة مالتي ناشيونال ايه يا عم والناس نايمين
حوش ياخويا الشركات حوش

دنا لو لقيت شركة كاذبة وهمية ممكن اخوض التجرية واشتغل فيها بس اعمل حاجة في حياتي دي

وجاءني صوت امي وهي تنادي
يا صلاح يا صلاح قوم يا صلاح ده الغدا جاهز ..
لم ارد ,, وبصراحة فقدت رغبتي في اي طعام او اي احتكاك بافراد عائلتي

شكلي بقى وحش اوي ادامهم وانا طويل وبدقن كدة وباخد مصروف من بابا
حاسس بالعجز الفظيع فعلا
لذلك كان الحل الامثل الهروب من الواقع و

النـــــــــــــــوم ...

وانزل ظلام اليأس اسداله علي من جديد ورحت اغط في نوم ليس بعميق ...

انتظروا المشاهد الاخري قريبا يعني بكره